इवलसं मन

इवलसं मन माझं

घेतय हो उंच भरारी

गगनाला  गवसणी

घालून मारतंय फेरी

इवलसं मन माझं

झालंय फुलपाखरू

बालपणीच्या आठवणीत

रमलं कसं आवरू

इवलसं मन माझं

गेलं एकदा माहेरी

आई-बाबांशी गूज

करुन फिरलं माघारी

इवलसं  मन  माझं

गेलं ' अहो 'च्या ऑफिसात

गर्रऽकन गिरकी मारुन

परत आलं हो  घरात !

© पुष्पा पटेल "पुष्पम्"

मृदगंध

डूबी हू तेरे प्यार में

तुझ्या प्रीतीचा गंध बेधुंद!

बिना बारीश भीगी रे मै रसीया

तू आषाढ मेघसरी मी रे मृदगंध!

© पुष्पा पटेल "पुष्पम्"

उंच भरारी

मुक्त  आभाळी  घेतली  उंच भरारी

नवी  उमेद  नवा विश्वास  ठेवून मी

जुनी आपुलकी आज फळा आली

नंदनवनात  भ्रमंती करुन आले मी

© पुष्पा पटेल " पुष्पम् "

शब्दफुले

सागरापाशी आहे शुभ्र मोती

नाही  रे  अप्रुप   त्याचे  मला

तुझ्या  लेखनीतील शब्दफुले

सख्या भुरळ घालती रे  मला

© पुष्पा पटेल " पुष्पम् "

वाट अनोळखी!

मनात ठेऊन आत्मविश्वासाची धग

अनोळखी वाटेवरुन चालतेय मी!

तमा ना बाळगली मी खाचखळग्यांची

शिखर गाठले धैर्याने ठेवून युक्ती नामी!

जे मिळविले ज्ञान ध्यानी ठेविले

पावलागणिक गुरुपदेश स्मरण केला मी

चालता वाट सापडे थांबला तो संपला

दिशाहिन वा-यातही यशोशिखरी पाय रोवले मी !

© पुष्पा पटेल " पुष्पम् "

नाती ममतेची

तमा  कशाचीही न  बाळगता मी नेहमी

केली हो मी सर्वांना मदत आपुलकीने

व्देष मनात कधीच फिरकू दिला नाही

जोडली नाती मी सर्वांशी माया-ममत्वाने !

© पुष्पा पटेल "पुष्पम्"

कृपाळा

असं काहीतरी नवीन

घडावे हो वेगळे...

आनंदाचा भरात मी जाऊन

सांगावं तुला सगळे...

अशी वेळ यावी कृपाळा

नमिते तुज रुप तुझे आगळे...

© पुष्पा पटेल "पुष्पम्"

मोकळा श्वास

संसारात  गुंता सोडवताना

मन  झाले  हो माझे उदास

गुंतून पडणे सोडून दिले मी

आता  घेतेय मोकळा श्वास

© पुष्पा पटेल " पुष्पम् "

आई

रमते घरात मायेने ती असते आई !

सर्वांच्या हिताचे निर्णय घेते ती आई !

स्वतःचा इच्छा बाजूला सारते आई !

घरासाठी कष्टत जगते ती तर आई !

सुख दुःखात ठाम उभी असते आई !

संकट येता बाळावरती वाघिण होते आई !

' होईल सगळं नीट ' म्हणून धीर देते आई !

भिऊ नको! चालत रहा! बळ देते आई !

बाळाच्या सुखात लोभ न दावी आई

निष्काम कर्मयोग शिकवित जगते आई!

© पुष्पा पटेल "पुष्पम्"

प्रिय शब्दसुमनांनो

माझ्या प्रिय शब्दसुमनांनो...!

तुम्ही असे दूर-दूर राहू नका

तुमचाच आधार आहे मज

हे तुम्ही कधी विसरू नका !

तुमच्या द्वारे मनीचे गुज उतरे

सुख लेखणीचे  हिरावू नका !

© पुष्पा पटेल "पुष्पम्"

अमृत चहा

जागतिक चहा दिनाच्या सर्वांना अमृतमय शुभेच्छा 💐💐💐

चहा म्हणजे संजीवनी असतो

रुग्णाची स्फूर्ती 

जगण्याची उर्मी 

कार्य करण्याची शक्ती

म्हणजे चहा...

कुणी चहा पितो

कुणी चहा पिते

कुणी म्हणे चहा घेतली का?

कुणी म्हणे चहा घेतला का?

कुणी काहीही म्हणा

पण चहा हवाच!

पावसाळ्यात वाफाळणारा

हिवाळ्यात गरम

उन्हाळ्यात गरमागरम

एक एक घोट रिचवावा

पण चहा हवाच!

असा चहा कसाही प्यावा

जमलं तर फुरकत

नाही तर फूऽफूऽ करत

नाही तर एकच घोटात

पण चहा हवाच!

चहालाही आहे

काळवेळेचे भान

तो पाहुणचाराला हवा

तो सुप्रभाती हवा

पार्टीला पहिला मान

मुलाखतीला टेबलावरची शान

असा हा दिव्य चहा हवाच!

© पुष्पा पटेल " पुष्पम् "

    म्हसावद

गीताई

गीता    जन्मोत्सव   साजरा केला

विचार   मी    गीतेचे   अंगिकारले

आधी   केले   मग  जना सांगितले

प्रभूस्पर्शी  शब्द ऐकता धन्य झाले

अठरा अध्यायी साठले ज्ञान भांडार

सातशे   श्लोक भासती जीवनाधार

जन्म  होय  तृप्त   करा   अमृतपान

स्विकारु स्वयें जनांसी देऊ सुविचार

© पुष्पा पटेल " पुष्पम् "

आनंदाचं जगणं

समजून  सांगते  हो  मी  सर्वांना

लादत नाही मी कधी  माझं म्हणणं

म्हणून तर आलं माझ्या जीवनात 

सुख-समृद्धि आणि आनंदाचं जगणं

© पुष्पा पटेल " पुष्पम् "

संकल्प

संकल्प केलाय  हो मी !

घाम गाळीन  स्वकमाई करेन

नाही करणार कोणाची हाजी

स्वाभिमानाने मी जगेन !

© पुष्पा पटेल " पुष्पम् "

आनंदे जगू

जीवन फक्त एकदाच मिळते

व्देष  मत्सर  हा बाजूला ठेवू

प्रेमाने  आणि  आनंदाने जगू

राग नको मानवता जागी ठेवू

© पुष्पा पटेल " पुष्पम् "

मौनंम्

मौनंम्   सर्वार्थ   साधनम् !

म्हटले  समाज  धुरीणांनी

उगीच नाही  हो  ही उक्ती

प्रचलित केली  ती सर्वांनी 

© पुष्पा पटेल " पुष्पम् "

सुखी सहजीवनाचे सूत्र

सख्या रे...

तोंडात साखर अन् डोक्यावर बर्फ

ठेवलाय की रे  मी आधीच !

सुखी सहजीवनाचे हे खरे सूत्र

संसारी होत नाही वाद-विवाद

कधीच !

© पुष्पा पटेल "पुष्पम्"

हे दयाळा

अडकवू नको देवा जन्मफे-यात मला

स्वार्थी या जगात मिळे मज उपहास

असह्य होती मज अशा ह्या गोष्टी

देवा लागू दे मना तुझ्या नामाचा ध्यास

आवडते तूज ते !  दिले मी तुला खास 

चरणी तुझ्या मिळो जागा हीच मज आस !

© पुष्पा पटेल "पुष्पम्"

सवय

कितीदा तुला सांगावे

मला काहीच कळेना

उशिरा उठायची सवय

तुझी जाता जाईना

"लवकर निजे लवकर उठे

त्यासी ज्ञानसंपत्ती भेटे"

हा मंत्र तू अंमलात आणना!

© पुष्पा पटेल "पुष्पम्"

निष्काम भक्ती

आहे हो  कृपा  भगवंताची

केली   मी  भक्ती  निष्काम

स्वतःचे असे काही  मिळावे

म्हणून केले  निष्ठेने मी काम!

© पुष्पा पटेल "पुष्पम्"

सुखाचे वारे

दुःखाचा भागाकार केला

विसरले आहे दुःख  सारे

सुखाचा  क्षण आणलाय

नको आता वेदनेचे पहारे

तुझी कृपा असू द्या साई

दुःखातही वाहतील सुखाचे वारे!

© पुष्पा पटेल "पुष्पम्"

मी भाग्यवंत!

आहे  प्रभूजीचा हात शिरावर

नाही हो  मला कुठलीच  खंत

का  ठेऊ मी मनात किंतू-परंतू

माझ्यासारखी मीच भाग्यवंत !

© पुष्पा पटेल "पुष्पम्"

खेळ भावनांचा

भावनांचा खेळ सारा

कुठवर खेळशी मना

जगी स्वार्थाचा बाजार

दखल  कुणी घेई ना

आपुलेच निघाले बेईमान

दुस-यासी बोलवेना

© पुष्पा पटेल "पुष्पम्"

चांद रात

सख्या चांदणे हे मनोहर आहे

नको देऊ दूर रहाण्याची सजा

ये ना या शितल अशा  रात्रीत 

घेऊ मनसोक्त फिरण्याची मजा!

© पुष्पा पटेल "पुष्पम्"

माझी धडपड

 समजून घेता घेता

ओलावतात डोळ्याचे कड

आयुष्याच्या पदपथावर चालतांना

करावीच लागते थोडीशी तडजोड

सगळ्यांची मर्जी  सांभाळून

स्वप्नांचा होतो सतत विमोड

स्वाभिमान राखताना मात्र मी

जीवापाड  करते  हो धडपड

© पुष्पा पटेल " पुष्पम् "