पहाटपुष्प

अस्तित्वाचा शोध घेतांना

खाचखळग्याची वाट तुडवतांना

अवचित लाभला तुझा हात

विखुरलेल्या स्वप्नांची पानं

धुंडाळतांना तूच दिली मज

आपुलकीची दाद !

जीवन खूप सुंदर आहे

तूच तर समजावले मला !

जन्म-मरणाचे उकलून राज

केलाय मी संकल्प...

तुझ्याच पाऊलावर पाय ठेऊन

चढते-उतरतेय मी तुझ्यासवे

निर्धाराने सुख-दुखाच्या घाट 

मनात पेटवून घेतलाय मी

एक आशेचा दिवा...

हाती घेऊन चालतेय मी

आयुष्याची वाट 

सख्या ! विश्वास आहे मला 

तुझ्या सहवासात गवसेल 

मला प्रकाशदिशेला नेणारी पहाट!

 ©® पुष्पा पटेल " पुष्पम् "

मकरसंक्रांती

तिळाची स्निग्धता 

गोडवा गुळ-साखरेचा 

घेऊन आला सण मकरसंक्राती

विसरा जुने  राग द्वेष अन् क्लेश

धागा गुंफू स्नेह सौख्याचा !

जोपासू आपुलकीची नाती

मनामनात उजळू दे प्रभो !

शुभ मंगलदायक शब्द तेजाचीज्योती!!!

आनंददायी मकरसंक्रांतीच्या गोड गोड शुभेच्छा!

©® पुष्पा पटेल " पुष्पम् "

राजमाता जिजाऊ

आऊ! तू होतीस म्हणून

उजाडली विश्वासाची पहाट 

शिवरायांना जन्म देऊन

मांडला स्वराज्याचा थाट

अनंत यातना सोसल्या

परी हार न मानिली आई

स्वराज्याचे बाळकडू पाजून

पेटवली ज्योती राजांचा हृदयी 

तूच घडविला मॉंसाहेब

एकेक श्वासासवे महा इतिहास

शब्दच झाले खड्ग तुझे

केला जुलमी सत्तेच्या -हास

घडविला तू जाणता राजा

अलौकिक शिकवण देऊन

त्रिवार वंदन जिजाऊ तुजला

आज मानाचा मुजरा करुन

         🙏🌹🙏

©® पुष्पा पटेल " पुष्पम् "

🦋 मन फुलपाखरू 🦋

आठवणींच्या हिंदोळ्यावर

मन माझे वेडे झुलते रे !

क्षणात येते क्षणात जाते

फुलपाखरू होऊन भिरभिरते रे !

बालपणीच्या अल्लड वाटा

उनाड होऊन चालते रे !

बालपणीच्या तो काळ सुखाचा

कानी हळूच गुणगुणते रे !

निमिषार्धात घेऊन गिरकी

सप्तरंग जीवनाचे दाखवी रे!

सुख हर्षाच्या गंधकोषी

सख्यासवे गूज करते रे !

नाजूक लता ही संसाराची

हळवे होऊन जपते रे !

आठवणींच्या हिंदोळ्यावर

मन माझे वेडे झुलते रे !

©® पुष्पा पटेल " पुष्पम् "

प्रेमग्रंथ

सख्या, पुस्तक समजून हाती घेतले तुला

प्रस्तावनेत  मिळाली  प्रेमाची  आन..

खात्रीने सांगू इच्छिते पुढील पानावर

देशील तू मज  तुझ्या  हृदयी स्थान..

©® पुष्पा पटेल "पुष्पम्"

अनाथांची माय

" अनाथांची माय: सिंधुताई यांना  शब्दसुमनांनी श्रद्धांजली !🌹🙏🏻

अनाथांचा ममत्वाचा वटवृक्ष कोसळला

आज काळ असा कसा हा निष्ठूर झाला

माई अनाथ लेकरांना तू तर दिली माया 

माई तुझा जाण्याने लाखोंची हरवली छाया

तुझाविना ओस आज ममता बालसदन

माई, तुझा जाण्याने भासे जणू ते निर्जण

ज्याला नव्हते कुणी त्यांची तू माय झाली 

तुझा विना आता त्यांना कोण ग् वाली  

तूझा एकटीत सामावले सहस्र मातांचं जगणं

माई तुझा कार्यापुढे आभाळंही वाटे ठेंगणं

झाले बहू होतील बहू तुझ्यासम ना कोणी

माई,तुला श्रद्धांजली वाहते राहीन मी ऋणी

माईंना भावपूर्ण श्रद्धांजली!

           💐😭🙏🏻

© पुष्पा पटेल " पुष्पम् "

कसोटी(शेलचारोळी)

ख-या माणसाला आयुष्यात कधी

कधी  तरी  कसोटी द्यावी लागते !

भिष्म असो किंवा युधिष्ठिर असो

असो ! त्यांच्या पश्चात जग पुजीते!

© पुष्पा पटेल " पुष्पम् "