माझी शब्दप्रीत...

वाटतं तितकं सोपं नाही बरं

गृहिणीला कवयित्री बननं

लाटणं असणा-या हातात लेखणी धरणं

अडचणी अनेक पण् ध्यास मात्र एक

कोंडलेल्या भावना कागदावर उतरवणं

कितीतरी चांगले विचार...

गरम फोडणीत मिक्स होतात 

कधी मिक्सरचा पात्यांमध्ये भरडले जातात

कधी कणिक मळतांना मळले जातात...

कधी साखरेचा पाकात अलगत घोळले जातात

अगदी सहजच...

तरीही ती धडपडते लिहायला

सोसलेलं,घेतलेलं,अनाहूत मिळालेले...

सुख कमी पण दुःख जास्त

मनाच्या कप्प्यात हृदयाच्या मलमली गाठोड्यात बांधलेले सगळं शब्दगंधाने परत द्यायला !

अनुभवलेलं विचार लेखनीतून मांडायला!

कधी यजमानांचा मार्गदर्शनाने

कधी समाजाच्या वर्तुळ परीघात राहून...

झटकून टाकते; लेखणीतील शाई झटकून टाकावी तसे...

मनातले मळकट दौर्बल्य एकेक अक्षरांनी उतरवते कागदावर !

धैर्याने...लढते प्रत्येक वळणावर... 

होते रणरागिणी वेळ आल्यावर 

स्वतःचे अनुभव सामर्थ्य घेऊन

 जन्मते तीची कला अष्टही आघाड्यांवर

 लढते ती होऊन नवदुर्गा!

विचार खड्गांचा खणखणाटातून दशदिशांना मग तिचाच बोलबाला !

©® पुष्पा पटेल " पुष्पम् "

पुष्पांची मांदियाळी

पुष्पांची मांदियाळी

होऊनी देव माझा रंगारी

टाकतो रोज प्रात:काळी

या  अंगणात  हो  माझा

पानाफुलांची सुबक रांगोळी

हे  स्वर्गसुख  बघतांना

आनंद अनुभवते मी दारी

आली सुख समाधानांची

मला भेटावया भक्तीवारी

भरुन  घेते मी डोळ्यात

कुंडीतली  शेवंती  गुणी 

पानापानांत हो बहरली

जाई - जुई   चहूबाजूंनी

कोप-यात  बघा मोगरा

मिरवतो त्याचाच  तोरा

बकुळी  मिरवीते  शेखी

प्रिय तिला केसांचा गजरा

चोर पाऊले येऊन देतो

सोनचाफा मंद परिमळ

मन  मोहवी  पुष्करिणी

सूर्य किरणांत श्वेतकमळ

काट्यासोबत  राहूनही 

सप्तरंगात फुले गुलाब

निराश  माझा  मनाची

तोच तर  राखतो आब

प्रीति  आणि  भक्तीची 

शिकवण   देते  तुळस

माझे तन मन ठेवी सुदृढ

फिरकू ना  देई आळस

माझा फुरसतीचा वेळ 

मज  वाटे  हर्ष  पर्वणी

पाने  फुले परिमळसंगे

प्रतिदिन मिळे मेजवानी

©® पुष्पा पटेल " पुष्पम् "

सख्या रे...

सख्या...नात्यातलं प्रेम

जणू कृष्णाच्या मुकूटातील मोरपीस

हळूवार जपतेय रे मी !

प्रीतिच्या श्रावणसरींत 

सप्तरंगी इंद्रधनु कवेत घेऊन

आनंदात चिंब भिजते मी!

तुझ्या हृदय फुलावर

शब्दसुमनांवर अलवार 

फुलपाखरू बनून बागडते मी!

कुणाचीही तमा न करता

होऊन लाट सागराची

तुझ्यात अल्लडपणे विसावते मी!

शेवटी काय...जीवन म्हणजे -

सुखदुःखाचा सप्तरंगी चलपट

विसरुन सारे बिंधास्त बघते मी!

आजची हिरवी पाने उद्याची पिवळी

ठेवते मी जाणीव...

ह्यालाच जीवन ऐसें नाव तुझी होऊन जगते मी!

©® पुष्पा पटेल " पुष्पम् "

प्रीत तुझी माझी

समजले  न मज कधी

मन माझे तुझ्यावर जडले

प्रेमाचं बीज कधी तू रे

हृदयी हो माझ्या पेरले

प्रितीचा रंगात तुझ्या

बेधुंद होऊनी मी रंगले

साजना कळेना मला रे

प्रेमांकूर कधी हे डवरले

प्रीत रोपटे गोंजारले तू

रोमरोमी बहरुन आले

पानोपानी वसंत फूलला

गंध सुमनांचे श्वासात मी कोंडले

मिठीत घेता तू मजला

हृदय हे ओथंबून आले

कळेना मज झाले काय असे

आज मी माझी नच उरले

©® पुष्पा पटेल " पुष्पम् "

स्वप्नांची दुनिया

राजा.. माझ्या स्वप्नांचा दुनियेत रे

तुझ्या रुपात होते आनंद बरसात

तू तर  माझं पहिलं प्रेम आहेस रे

प्रितीचे माणिक-मोती मिळती मज

तुझ्या हृदयसागरात !

©® पुष्पा पटेल " पुष्पम् "

वंदन भारतमाते🙏

भाग्यवंत मी! अभिमान मजला

नागरिक भारत देशाची !!!

वारस मी भारतमातेच्या मुक्तीसाठी

प्राणार्पण केलेल्या हुतात्म्यांची...

वाचते मी गाथा त्या त्यागाची

मुक्त कराया भारतमाते

टिळा लावला रक्ताचा भाळी

तुझ्या थोर सुपूत्रांची !

जुलूमी सत्ता जाळूनी दाविला

सूर्योदय मज स्वातंत्र्याचा 

करेन भारतमाते तुझी पूजा

वंदे मातरम् महा मंत्रांनी !

कथा सदैव स्मरेन मी बलीदानाची

इतिहासाच्या पानोपानी सुवर्णाक्षरे 

कोरली नावे त्या समरविरांची 

शिष नमवून मी करीते नमन 

पावन हे भारतमाते

प्रजासत्ताक दिनी उच्चरवाने

इन्कलाब जिंदाबाद ! जय हिंद ! गाते.

प्रजासत्ताक दिनाच्या सर्वांना हार्दिक शुभेच्छा!🌹🌹🙏🙏

©® पुष्पा पटेल " पुष्पम् "

* लेक माझी लाडाची *

* लेक माझी लाडाची *

लेक  माझी हो लाडाची

राजकन्या शोभे  घराची

जणू सोनपावलांनी आली 

माझ्या घरी लक्ष्मी आनंदाची

लेक माझी हो खूपच शहाणी

मुखी तिच्या सावित्रीची गाणी

सर्वांशी बोले मायेने  गोडगोड

एक एक शब्द अमृताची फोड

घरकामात तिचा मज मदतीचा हात

भावभक्तीने  लावी  देवघरात   वात

अशी  माझी  गोडूली वाटे  सोनपरी

आठवणींचे गाठोडे ठेवून नांदते सासरी

अशी  लेक  हो  माझी  भाग्याची 

लेकीदिनाला आठवलं तिचं कर्तृत्व

तिचं जगणं जणू वटवृक्षाची छाया

लेकीच्या जन्माने धन्य झाले मातृत्व !

©® पुष्पा पटेल " पुष्पम् "